Policia spanjolle ka nisur një hetim për vrasje të dyshuara pas mbërritjes së një anijeje me emigrantë në Ishujt Kanarie, ku rreth 70 persona rezultojnë të zhdukur. Në bord udhëtonin afro 320 persona nga Afrika Perëndimore, por vetëm 251 arritën të gjallë.
Të mbijetuarit kanë dëshmuar se gjatë udhëtimit disa pasagjerë janë qëlluar me armë dhe janë hedhur në det, ndërsa të tjerë kanë humbur jetën nga dehidratimi ose janë hedhur vetë në ujë në gjendje deliriumi.
Varka e tipit “kajuko” ishte nisur nga Sahara Perëndimore, por pësoi defekt në motor dhe qëndroi rreth 11 ditë në det pa furnizime. Rojet bregdetare spanjolle arritën të shpëtonin 251 persona rreth 265 milje larg Ishujve Kanarie.
Policia është duke kërkuar deri në 30 burra në strehimore të ndryshme emigrantësh, të cilët dyshohet se kanë rol në ngjarje. Sipas burimeve gjyqësore të cituara nga agjencia EFE, disa prej tyre janë identifikuar dhe arrestimet priten së shpejti. Nëse shpallen fajtorë, të dyshuarit mund të përballen me burgim të përjetshëm.
“Rruga Perëndimore” drejt Ishujve Kanarie mbetet një nga itineraret më të rrezikshme për emigrantët afrikanë. Maroku, që ndan kontrollin e këtyre ujërave me Spanjën, ka deklaruar se nuk ka burime të mjaftueshme për të përballuar emergjencën në rritje.