Një aktivitet simbolik u zhvillua në Shkodër, ku dhjetëra familje legaliste dhe mbështetës të Mbretit Zog u nderuan për kontributin e tyre historik.
Në takim mori pjesë Princ Leka Zogu II, i cili vlerësoi besnikërinë dhe qëndresën e shkodranëve ndër vite, duke theksuar lidhjen e veçantë të familjes mbretërore me qytetin verior.
“Shkodra ka qenë gjithmonë vatër e besimit dhe qëndresës. Mirënjohje për gjithë zogistët që qëndruan pranë familjes time,” – u shpreh princ Leka gjatë fjalës së tij.
Në aktivitet foli edhe Ted Kopliku, ish-kandidat i Partisë Demokratike në Shkodër, i cili përfaqësoi legalistët në zgjedhjet e 11 majit. Ai theksoi se periudha e Mbretit Zog përfaqësonte një shembull ndërtimi institucional dhe shtetformimi.
“Në kohën e Mbretit Zog treguam se ndërtojmë shtetin,” – tha Kopliku.
Ndërsa kryetari i Legalistëve, Sokol Axhami, theksoi se është koha për rikthimin e sistemit mbretëror, duke e cilësuar atë si një garanci për stabilitet dhe unitet kombëtar.
“Kemi detyrim të rikthejmë sistemin mbretëror. Ai garanton stabilitet, unitet dhe zhvillim,” – u shpreh Axhami.
Në përmbyllje të takimit, Princ Leka II ndau certifikata mirënjohjeje për disa familje shkodrane që, sipas tij, i kanë qëndruar besnike traditës dhe vlerave të monarkisë shqiptare.