ELBASAN, 31 korrik 2026/Albania Express News/-Dezinformimi online dhe dhuna digjitale ishin në fokus të mbledhjes së radhës së Këshillit Vendor të Sigurisë Publike në Elbasan, ku morën pjesë institucionet përgjegjëse dhe partnerët lokalë.
Kryetari i bashkisë së Elbasanit, Gledian Llatja bëri të ditur se mbrojtja e fëmijëve dhe të rinjve mbetet një nga prioritetet kryesore të bashkisë, duke theksuar se në 57 shkollat e kësaj bashkie studiojnë rreth 16 mijë nxënës.
Gjatë mbledhjes u diskutuan masat e parashikuara në Paketën e Sigurisë në Shkolla 2026–2027, si dhe u prezantua aplikacioni “Raporto Tani”, i cili synon të lehtësojë raportimin dhe ndërhyrjen e hershme në rastet problematike.
“Dizinformimi online dhe dhuna digjitale janë sfida që prekin çdo familje, çdo shkollë dhe gjithë komunitetin tonë. Pikërisht për këtë arsye, mbledhja e radhës e Këshillit Vendor të Sigurisë Publike iu kushtua këtyre çështjeve, me pjesëmarrjen e institucioneve përgjegjëse dhe partnerëve tanë.
“Me rreth 16 mijë nxënës në 57 shkolla, mbrojtja e fëmijëve dhe të rinjve mbetet prioriteti ynë. Në këtë kuadër diskutuam edhe masat e Paketës së Sigurisë në Shkolla 2026-2027, si dhe prezantuam aplikacionin “Raporto Tani”, një mjet i rëndësishëm për raportimin dhe ndërhyrjen e hershme në rastet problematike”, theksoi ai.
Sipas Llatjes, siguria ndërtohet përmes bashkëpunimit ndërinstitucional dhe investimit në edukimin e të rinjve.
“Në Elbasan besojmë se siguria ndërtohet përmes bashkëpunimit. Duke forcuar koordinimin mes institucioneve, duke investuar në edukimin dhe ndërgjegjësimin e të rinjve dhe duke rritur besimin e qytetarëve, mund të parandalojmë dizinformimin, mashtrimet online dhe dhunën digjitale, për të ndërtuar së bashku një komunitet më të sigurt, më të informuar dhe më të përgjegjshëm”, tha ai.