Skuadra e Valbonës, ndodhet sërish në një situatë të vështirë dhe po shkon drejt shkrirjes. Sezoni i kaluar, që nisi me pritshmëri të larta, u mbyll me rënie nga Kategoria e Parë për shkak të problemeve jashtë fushe. Ekipi, i ndërtuar fillimisht për të qenë konkurrues, tregoi se kishte potencial me disa ndeshje të spikatura ndaj rivalëve të fortë. Megjithatë, financat e dobëta sollën pasoja të rënda, duke detyruar disa prej lojtarëve kryesorë të largoheshin.
Në ndeshjet e fundit, skuadra e kishte të vështirë të plotësonte edhe formacionin bazë. Pas rënies në Kategorinë e Dytë, situata organizative u përkeqësua edhe më tej. Aktualisht, ekipi nuk ka një grup të formuar për të nisur sezonin. Bashkia e Tropojës ka nisur përpjekjet për të gjetur një administrator, por mungesa e garancive financiare ka frenuar çdo ofertë.
Kjo nuk është hera e parë që Valbona përballet me problematika të ngjashme. Në sezonin 2021-22, klubi u tërhoq nga kampionati dhe u rrëzua në Kategorinë e Tretë. Përveç kësaj, detyrimet e pashlyera kanë sjellë bllokim të merkatos nga FIFA. Nëse nuk gjendet një zgjidhje e menjëhershme, ekziston rreziku që skuadra të mos paraqitet në sezonin e ri, duke lënë futbollin e Tropojës pa përfaqësues në garat kombëtare.