TIRANË ,02 shtator 2026 / Albania Express News /-Fundi i një epoke te Interi. Pas 28 vitesh bashkëpunim, Piero Ausilio dhe klubi zikaltër duket se janë pranë ndarjes.
Sipas raportimeve nga Italia, kontrata e Drejtorit Sportiv skadon në vitin 2027, por palët nuk kanë arritur marrëveshjen për rinovimin e saj. Ausilios i është propozuar një kontratë e re njëvjeçare, me të njëjtat kushte ekonomike si marrëveshja aktuale, por oferta nuk e ka bindur drejtuesin zikaltër.
Për këtë arsye, Ausilio pritet të largohet nga Interi në fund të sezonit, duke i dhënë fund një prej bashkëpunimeve më të gjata në futbollin europian.
Ausilio është pjesë e Interit prej 28 vitesh. Ai e nisi karrierën në klub si sekretar i ekipeve të moshave dhe, falë punës së tij, ngjiti gradualisht shkallët e strukturës zikaltër, deri në pozicionin e Drejtorit Sportiv të ekipit të parë.
Në vitin 2014 mori zyrtarisht drejtimin e sektorit sportiv të klubit, pasi ishte formuar për vite me radhë nën drejtimin e Marco Brancës.
Gjatë periudhës së tij si Drejtor Sportiv, Interi ka fituar 3 tituj të Serie A, 3 Kupa të Italisë dhe 3 Superkupa Italiane.
Ausilio ka qenë gjithashtu dëshmitar i ndryshimeve të rëndësishme në historinë moderne të klubit, përfshirë edhe tre ndryshime në pronësinë e Interit.
Nëse largimi konfirmohet, Interi do t’i japë fund një kapitulli të rëndësishëm të historisë së tij moderne, ndërsa Ausilio do të largohet pas gati tri dekadash shërbim ndaj klubit.
Një epokë që mund të mbyllet në fund të këtij sezoni.