Nga Vladimir Mema
Elbasani ka nisur sezonin e ri të Superiores me këmbën e mbarë, duke marrë një fitore që ka ndezur menjëherë entuziazmin e tifozëve verdheblu. Në një qytet ku futbolli ka gjithmonë aromë historie dhe krenarie, ky fillim i mbarë shihet si sinjal se skuadra e drejtuar nga Ivan Gvozdenoviç mund të synojë stabilitet dhe rezultate solide.
Pas rikthimit në elitë sezonin e kaluar dhe qëndrimit dinjitoz, Elbasani duket më i qetë dhe më i konsoliduar. Pak lëvizje në merkato, por me një bosht të ruajtur dhe një frymë grupi që nuk mungon.
Analiza e Muharrem Dostit
Ish-portieri dhe trajneri i mirënjohur Muharrem Dosti, që njeh mirë mentalitetin e skuadrës dhe atmosferën e qytetit, ka komentuar fitoren e parë:
“Skuadra ka ruajtur një bërthamë të rëndësishme lojtarësh dhe ka punuar mirë gjatë fazës përgatitore. Fitorja e parë gjithmonë jep siguri dhe qetësi në ekip”, tha Dosti.
Ai shtoi se ndeshja e radhës me Egnatian do të jetë një provë e vërtetë për të treguar nëse ekipi ka potencial për të qëndruar lart. “Egnatia është skuadër stabile dhe cilësore, një test i vërtetë për karakterin e ekipit”, u shpreh Dosti.
Stabilitet dhe pak lëvizje në merkato
Pak ndryshime në përbërje këtë merkato, sipas Dosit, janë avantazh: “Kur ke një grup që e njeh njëri-tjetrin, nuk humbet kohë duke u përshtatur. Stabiliteti është një vlerë e madhe, sidomos në Superiore. Natyrisht, afrime cilësore gjithmonë nevojiten, por më mirë pak dhe të zgjedhur sesa shumë pa kriter”.
Kampionati këtë sezon
Dosti vlerëson se gara do të jetë e ngushtë dhe interesante: “Nuk ka një ekip që dominon. Egnatia, Dinamo, Vllaznia, Partizani dhe Elbasani duket se janë më të konsoliduar për pjesën e Final 4. Tirana mbetet faktor, ndërsa surpriza mund të vijë edhe nga Flamurtari apo skuadra të tjera”.