Nancy VanHorn, e Ngarkuara me Punë e SHBA në Tiranë, ka zhvilluar këtë të premte një takim me ministren Albana Koçiu. Ajo i ka kërkuar shefes së Punëve të Brendshme, që gjatë mandatit të saj të zbatojë porositë e Presidentit Donald Trump, për zhdukjen e karteleve dhe grupeve kriminale ndërkombëtare.
Diplomatja amerikane ka theksuar se duke punuar së bashku forcat e rendit të SHBA dhe Shqipërisë mund të çmontojnë rrjetet e paligjshme financiare dhe të mohojnë strehimin e sigurt për trafikantët e drogës dhe terroristët, duke i bërë të dy vendet tona më të sigurta.
“Sot, e Ngarkuara me Punë Nancy VanHorn theksoi edhe një herë përkushtimin e qartë të Presidentit Trump në zhdukjen e karteleve dhe grupeve kriminale ndërkombëtare gjatë takimit të saj të parë me Ministren e re të Punëve të Brendshme Albana Koçiun.
Duke punuar së bashku, forcat e rendit të Shteteve të Bashkuara dhe Shqipërisë mund të çmontojnë rrjetet e paligjshme financiare dhe të mohojnë strehimin e sigurt për trafikantët e drogës dhe terroristët, duke i bërë të dy vendet tona më të sigurta”, thuhet në njoftimin e Ambasadës së SHBA.
Politikania socialiste Albana Koçiu është zgjedhur ministre e Brendshme dy javë më parë, në Asamblenë e Partisë Socialiste, dhe është e para ministre grua që drejton këtë dikaster.