TIRANË ,18 gusht 2026/Albania Express News/- Atmosfera në kampin e Dinamo City është elektrizuese pas kualifikimit europian ndaj Audas, ndërsa presidenti i klubit, Ardian Bardhi, ka zgjedhur ta shpërblejë menjëherë skuadrën për suksesin e arritur.
Teksa lojtarët po festonin në dhomat e zhveshjes pas eliminimit të skuadrës letoneze, aty ka mbërritur presidenti Bardhi, i cili u ka dhënë lojtarëve një premio për kualifikimin. Paratë janë shpërndarë mes futbollistëve në mes të festës, në një moment që tregon edhe një herë atmosferën dhe motivimin e madh që ekziston brenda kampit “blu”.
Por kjo nuk është premioja e vetme që pret skuadrën e Dinamo City .
Klubi kryeqytetas tashmë ka përpara një prej sfidave më të rëndësishme të sezonit, një përballje që mund të ndikojë ndjeshëm në historinë europiane të Dinamo City dhe në arkën e klubit.
Më 20 gusht, në “Elbasan Arena”, Dinamo do të presë Pafos në ndeshjen e parë të play-off-it të Conference League. Takimi i kthimit do të zhvillohet një javë më pas, më 27 gusht, në Qipro.
Objektivi është i qartë: eliminimi i Pafos dhe sigurimi i një vendi në fazën e ligës së Conference League.
Për këtë kualifikim, presidenti Ardian Bardhi ka vendosur një premio të jashtëzakonshme prej 500 mijë eurosh për skuadrën.
Pra, nëse Dinamo City arrin të kalojë pengesën qipriote, futbollistët do të shpërblehen me një shumë të konsiderueshme, ndërsa klubi do të sigurojë gjithashtu të ardhura të rëndësishme nga UEFA dhe një tjetër kapitull të rëndësishëm në aventurën europiane.
Dinamo City ka siguruar deri tani rreth 1.450.000 euro nga rrugëtimi i saj europian dhe kualifikimi ndaj Pafos do t’i hapte rrugën për të ardhura të tjera, krahas prestigjit sportiv që sjell pjesëmarrja në fazën e ligës së Conference League.
Egnatia kërkon Europa League
Në garën europiane vijon të jetë edhe Egnatia, e cila ndodhet përpara një tjetër sfide të rëndësishme.
Rrogozhinasit do të përballen me norvegjezët e Lillestrøm në play-off-in e Europa League. Ndeshja e parë do të luhet më 20 gusht, në orën 19:00, në Rrogozhinë, ndërsa takimi i kthimit do të zhvillohet më 27 gusht, në orën 19:00, në transfertë.
Egnatia ka siguruar tashmë pjesëmarrjen në fazën e ligës së Conference League, ndaj përballjet me Lillestrøm janë një mundësi për të bërë një tjetër hap historik dhe për të siguruar pjesëmarrjen në fazën e ligës së Europa League.
Klubi rrogozhinas ka grumbulluar deri tani rreth 3.870.000 euro nga aventura europiane dhe një kualifikim në Europa League do t’i sillte të ardhura të tjera të rëndësishme, përveç rritjes së prestigjit të klubit në arenën ndërkombëtare.
Kështu, futbolli shqiptar hyn në një prej periudhave më të rëndësishme të këtij edicioni europian.
Dinamo City luan për Conference League, Egnatia për Europa League, ndërsa në sfond janë miliona euro, prestigji ndërkombëtar dhe mundësia për të shkruar histori.
Për Dinamo City , sfida ndaj Pafos ka edhe një motiv shtesë: 500 mijë eurot e premtuara nga presidenti Ardian Bardhi, të cilat tashmë janë kthyer në një tjetër objektiv të madh për skuadrën “blu”.