GRAMSH ,24 qershor 2026/Albania Express News/Kapriçot e motit vijojnë të sjellin pasoja të konsiderueshme në qarkun e Elbasanit, duke shkaktuar dëme të shumta në sektorin bujqësor. Pas reshjeve intensive të shiut dhe stuhive që kanë përfshirë zonën ditët e fundit, këtë pasdite fshati Drizë në bashkinë e Gramshit është goditur nga një breshër i fortë, i cili ka dëmtuar sipërfaqe të tëra të mbjella dhe vreshta.
Sipas banorëve të zonës, stuhia ka qenë e shkurtër në kohëzgjatje, por me intensitet të lartë. Brenda pak minutash, kokrrat e breshërit kanë goditur kulturat bujqësore, duke shkaktuar dëme të konsiderueshme në prodhimet e stinës që ndodheshin në fazën e zhvillimit dhe të korrjes.
Fermerët tregojnë se janë prekur veçanërisht parcelat me perime, kulturat foragjere dhe vreshtat, të cilat përbëjnë një nga burimet kryesore të të ardhurave për familjet e zonës. Ata shprehen të shqetësuar se dëmet mund të ndikojnë ndjeshëm në ekonominë familjare, pasi investimet e kryera gjatë muajve të fundit rrezikojnë të humbasin brenda pak çastesh.
“Punon gjithë ato muaj me bujqësinë dhe ta merr breshëri brenda 10 minutash”, shprehet një banor i fshatit Drizë, duke përmbledhur zhgënjimin dhe shqetësimin e fermerëve pas fenomenit atmosferik.
Banorët kërkojnë ndërhyrjen e institucioneve përgjegjëse për të kryer verifikimin dhe vlerësimin e dëmeve në terren, ndërsa shpresojnë për mbështetje në përballimin e humbjeve të shkaktuara nga moti i keq.
Fenomenet e ditëve të fundit kanë prekur jo vetëm bujqësinë, por edhe sektorin blegtoral dhe infrastrukturën në disa zona të qarkut të Elbasanit. Reshjet e dendura, stuhitë dhe shkarkesat elektrike kanë sjellë përmbytje lokale, rrëshqitje dherash dhe probleme në qarkullim, duke e bërë fundin e muajit qershor një nga periudhat më problematike për banorët e zonës.
Ndërkohë, parashikimet meteorologjike sinjalizojnë se moti i paqëndrueshëm mund të vijojë edhe në ditët në vijim, çka mban në alarm fermerët dhe strukturat vendore, të cilat po monitorojnë situatën dhe pasojat e saj në terren.
