TIRANË, 8 korrik 2026/Albania Express News/- Kryetari i Partisë Demokratike, Sali Berisha deklaroi sot se kryeministri Edi Rama ka bllokuar udhëtimin e presidentit Bajram Begaj si kryetar i delegacionit shqiptar në samitin e NATO-s në Ankara.
Në një postim në rrjetet sociale Berisha publikoi mesazhin e diplomatit digjital, sipas të cilit Presidenti Begaj ishte përcaktuar si kryetar i delegacionit shqiptar, ndërsa Rama si anëtar i delegacionit.
Berisha thekson se “ndonëse shkresa e dërguar pranë autoriteteve protokollare pritëse sipas dy burimeve diplomatike informonte se delegacioni shqiptar kryesohej nga presidenti Bajram Begaj dhe anëtarë Edi Rama etj. Por Rama ka bllokuar udhëtimin e tij si në avionin-taksi të prenotuar nga delegacioni shqiptar, ashtu dhe me linjat tregtare dhe është nis vetëm me bashkëshorten e tij me një avion që sipas medieve i kushton dhjetëra e mijëra euro ora e fluturimit”.
“Dënoj me forcën më të madhe këtë akt të rëndë banditesk antikushtetues të Edi Ramës ndaj kreut të shtetit të vendit me të cilin ai dëshmon edhe njëherë përqendrimin e të gjitha pushteteve në duart e tij”, tha Berisha.