BELSH,26 maj 2026/Albania Express News/Bashkia Belsh ka bërë të ditur realizimin e ndërhyrjeve për sistemimin e segmenteve rrugore të dëmtuara nga rrëshqitjet e dheut të shkaktuara gjatë periudhës së reshjeve intensive.
Sipas njoftimit të publikuar në faqen zyrtare të bashkisë, është kryer sistemimi i segmentit problematik në rrugën Shelg–Grekan, ku reshjet kishin shkaktuar rrëshqitje dhe vështirësi në qarkullim. Paralelisht, është bërë edhe rihapja e një rruge të bllokuar nga rrëshqitja në një nga lagjet e Rrenasit.
Ndërhyrja ka sjellë përmirësim të ndjeshëm të lëvizjes së automjeteve dhe banorëve të zonës, duke rikthyer normalitetin në qarkullim dhe duke rritur sigurinë në këto akse lokale.
Autoritetet vendore theksuan se puna në terren vijon për monitorimin dhe mirëmbajtjen e infrastrukturës rrugore, me qëllim garantimin e aksesit dhe kushteve sa më të mira për komunitetin.