TIRANË ,22 shtator 2026 /Albania Express News/-Analisti Mentor Kikia ka reaguar pas zhvillimeve të fundit në kuadër të hetimeve të SPAK dhe vendimeve të GJKKO-së, ku në qendër të hetimeve janë vënë zyrtarë të lartë të institucioneve të sigurisë.
Në një postim në rrjetet sociale, Kikia shprehet se zhvillimet e fundit kanë ngritur pikëpyetje të forta mbi funksionimin e institucioneve dhe marrëdhëniet e zyrtarëve të lartë me persona të përfshirë në hetime.
“Këtu, as fundi nuk ka fund! Çfarë ka ngelur më pa ndodhur?”, shkruan Kikia në nisje të reagimit të tij.
Ai ndalet te kreu i Shërbimit Informativ të Shtetit, duke pretenduar se Vlora Hyseni është vënë nën masën e arrestit në shtëpi dhe është pezulluar nga detyra me vendim të GJKKO-së. Sipas Kikisë, në kuadër të hetimeve ekzistojnë dyshime se informacione të klasifikuara i janë përcjellë Ergys Agasit.
Kikia përmend gjithashtu ish-drejtorin e Përgjithshëm të Policisë së Shtetit, Ilir Proda, duke iu referuar kontrolleve të kryera në banesën e tij dhe sekuestrimit të disa pajisjeve dhe sendeve, mes tyre telefona dhe laptop.
Analisti ngre pikëpyetje edhe për persona të tjerë të niveleve të larta të strukturave të sigurisë, duke përfshirë edhe drejtuesin e laboratorit shkencor të Policisë së Shtetit.
Duke komentuar situatën, Kikia shkruan se në Shqipëri shpesh zhvillimet e reja shoqërohen me perceptimin se “ky është fundi”, por sipas tij, ngjarjet e fundit tregojnë se “as fundi nuk ka fund”.
Në përfundim, analisti e përqendron reagimin e tij te një pyetje që e quan “mister kombëtar”:
“Çfarë ishte Ergys Agasi, që i shkonin në zyrë edhe kreu i SHISH, edhe kreu i Policisë, edhe, edhe…?”
Pretendimet dhe vlerësimet e mësipërme janë pjesë e reagimit të Mentor Kikisë dhe duhen lexuar në kuadër të zhvillimeve dhe hetimeve që po zhvillohen nga organet kompetente.