Ambasada e Britanisë së Madhe në Tiranë dënoi ngjarjen e ndodhur dje në ambientet e Gjykatës së Apelit në Tiranë, ku u vra me armë zjarri gjyqtari Astrit Kalaja dhe mbetën të plagosur dy persona të tjerë.
Në një reagim në rrjetet sociale, ambasada britanike thekson se “jemi thellësisht të pikëlluar nga vdekja tragjike e gjyqtarit Astrit Kalaja”.
“Dënojmë fuqishëm aktin e dhunës dhe bëjmë thirrje për masa urgjente për të garantuar sigurinë e gjyqtarëve dhe integritetin e gjykatave”, u shpreh ambasada britanike.
Ambasada britanike i shprehu ngushëllimet familjes, miqve dhe kolegëve të gjykatësit Astrit Kalaja.
Në Gjykatën e Apelit të Juridiksionit të Përgjithshëm në Tiranë pasditen e djeshme u qëllua me armë zjarri gjyqtari Astrit Kalaja, i cili për pasojë humbi jetën. Nga të shtënat u plagosën gjithashtu dy persona të tjerë, palë në një proces gjyqësor.