Më 26 shtator 2025, në Gjinar të Elbasanit, u përkujtua me nderim dhe mirënjohje 81-vjetori i formimit të Brigadës XVII Sulmuese të Ushtrisë Nacionalçlirimtare, një nga formacionet më të rëndësishme të luftës antifashiste në vendin tonë.
E krijuar më 26 shtator 1944, kjo brigadë u ngrit nga bijtë dhe bijat e Shpatit, Vërçës, Dumresë dhe krahinave të tjera të Elbasanit, të cilët u bashkuan në idealin e madh për çlirimin e Atdheut. Luftëtarët e Brigadës XVII Sulmuese dhanë një kontribut të jashtëzakonshëm në betejat vendimtare për çlirimin e Shqipërisë nga pushtuesit nazifashistë.
Sot, përulemi me respekt të thellë para kujtimit të rreth 700 luftëtarëve të kësaj brigade, dëshmorë dhe veteranë, që sakrifikuan gjithçka për lirinë dhe dinjitetin kombëtar. Trashëgimia e tyre mbetet një gur themeli në historinë tonë dhe një udhërrëfyes frymëzimi për brezat e rinj.
Përkujtimi i 81-vjetorit të Brigadës XVII është jo vetëm një akt nderimi ndaj të rënëve dhe veteranëve, por edhe një thirrje për të mos harruar rrënjët e lirisë dhe për të ruajtur me kujdes vlerat e atdhedashurisë, unitetit dhe sakrificës.
