Në këto ditë të para të vjeshtës, porti i Sarandës priti një tjetër kroçerë luksoze, “Seabourn Encore”, e kompanisë “Seabourn”, e njohur për shërbimin e saj të nivelit të lartë dhe udhëtime në destinacione ndërkombëtare si Mesdheu, Deti i Zi dhe Karaibet.
Kroçera u ankorua në orët e para të mëngjesit me 597 turistë nga SHBA, Australia, Britania e Madhe dhe Kanadaja. Ky është vizita e dytë e kroçerës këtë sezon, pasi erdhi edhe në muajin prill me 600 turistë.
Turistët u organizuan në grupe për të vizituar atraksionet kryesore të Sarandës, përfshirë Butrintin, Ksamilin, Syrin e Kaltër, kalanë e Lëkurësit dhe Mesopotamin.
Qyteti i Sarandës regjistron rritje të dukshme turistike: nga 1 janari deri më 3 shtator, 560 mijë udhëtarë kanë hyrë dhe dalë me tragete, kroçera dhe anije turistike, një fluks 21% më i lartë se në të njëjtën periudhë të vitit 2024.