TIRANË , 19 nëntor 2026/Albania Express News/- Dinamo City rikthehet në fushën e lojës pas ndërprerjes dyjavore të kampionatit, me një transfertë të vështirë përballë AF Elbasanit. Sfida do të luhet nesër në stadiumin “Elbasan Arena”, në kuadër të kampionatit “Abissnet Superiore”, ndërsa te skuadra kryeqytetase besimi për një rezultat pozitiv është i plotë.
Në prag të kësaj përballjeje, zëvendëstrajneri i Dinamo City, Renaldo Kalari, ka folur për përgatitjet e ekipit, gjendjen fizike të futbollistëve dhe pritshmëritë për ndeshjen ndaj verdhebluve.
Kalari vlerësoi punën e zhvilluar gjatë periudhës së ndërprerjes së kampionatit, duke theksuar se skuadra ka shfrytëzuar kohën në dispozicion për të korrigjuar gabimet dhe për të përmirësuar elementët e lojës.
Grupi pothuajse i plotë, disa mungesa në dispozicion
Sipas Kalarit, skuadra është në gjendje të mirë përpara kësaj sfide, megjithëse do të ketë disa mungesa për shkak dëmtimesh dhe pezullimesh.
“Rikthehemi pas një pauze dyjavore. Grupi është pothuajse i plotë, me dy-tre mungesa për shkak të dëmtimeve dhe pezullimeve nga kartonët. Kemi punuar mirë gjatë kësaj periudhe, pavarësisht mungesës së lojtarëve që ishin të grumbulluar me kombëtaret. Kemi analizuar me kujdes edhe ndeshjen e fundit ndaj Skënderbeut, për të përmirësuar fazën sulmuese dhe për të rritur shpejtësinë e veprimeve në manovrën e skuadrës”, u shpreh zëvendëstrajneri i Dinamos.
Respekt për AF Elbasanin, por objektivi është fitorja
Duke folur për kundërshtarin, Kalari vlerësoi ndryshimet që ka pësuar AF Elbasani krahasuar me përballjen e fazës së parë, duke nënvizuar se stafi teknik e ka analizuar me kujdes skuadrën verdheblu.
“Përballë kemi Elbasanin, një skuadër që e kemi analizuar dhe që është ndryshe nga ajo me të cilën u përballëm në fazën e parë. E kemi përgatitur sa më mirë këtë ndeshje dhe nesër do të synojmë të paraqitemi në mënyrën më të mirë të mundshme”, deklaroi Kalari.
Rikthimi përballë Glen Dajës, vlerësim për ish-kolegun
Një element i veçantë i kësaj përballjeje është edhe takimi me trajnerin e AF Elbasanit, Glen Daja, i cili më parë ka qenë pjesë e stafit teknik të Dinamo City.
Kalari nuk e fshehu vlerësimin për ish-kolegun dhe mikun e tij, duke e cilësuar largimin e Dajës një humbje profesionale dhe njerëzore për stafin e Dinamos.
“Gleni është shoku dhe miku im, përtej kësaj ndeshjeje. Largimi i tij është një vlerë më pak për stafin e Dinamos, ndërsa për Elbasanin është një vlerë e madhe profesionale dhe njerëzore. Nesër, ne do të bëjmë gjithçka për ta fituar ndeshjen”, theksoi zëvendëstrajneri i bluve.
Dinamo City udhëton me objektiv të qartë
Në përfundim, Kalari konfirmoi gatishmërinë e skuadrës për sfidën në “Elbasan Arena”, duke shprehur besimin se futbollistët do të japin maksimumin, pavarësisht mungesave.
“Jemi gati. Pavarësisht lojtarëve të dëmtuar apo të pezulluar, kemi një organikë të plotë për ta përballuar këtë ndeshje. Ashtu siç kanë bërë në çdo takim, jam i sigurt se lojtarët do të japin maksimumin dhe më të mirën e tyre për të arritur objektivat tanë”, përfundoi Kalari.
Përballja AF Elbasani – Dinamo City pritet të jetë një nga sfidat interesante të kësaj jave në Abissnet Superiore, ku të dyja skuadrat do të kërkojnë të rikthehen me rezultat pozitiv pas ndërprerjes së kampionatit.

