TIRANË – Kryeministri Edi Rama ka përsëritur edhe këtë të hënë ftesën për dialog drejtuar protestuesve, të cilët prej ditësh vijojnë të refuzojnë uljen në bisedime me kreun e qeverisë.
Në një tjetër mesazh të publikuar në rrjetet sociale, Rama ka ndarë pamje nga vendosja e “sofrës së gurtë” përpara godinës së Kryeministrisë. Mbi të janë vendosur disa letra me mbishkrimin “Dialog”, ndërsa kryeministri e ka shoqëruar videon me përshëndetjen: “Mirëmëngjes”.
Pavarësisht ftesave të përsëritura, protestuesit nuk kanë pranuar deri më tani të ulen në tryezën e dialogut, duke këmbëngulur në kërkesat e tyre.
Protesta nisi më 13 tetor, me pjesëmarrjen e gjimnazistëve dhe studentëve përpara Ministrisë së Arsimit. Në krah të tyre janë pozicionuar edhe pedagogët, të cilët kanë bojkotuar procesin mësimor, duke deklaruar se do të vijojnë mbështetjen deri në plotësimin e kërkesave të të rinjve.
Ndërkohë, gjatë javëve të fundit, protestat janë shoqëruar me episode të dhunshme dhe përplasje mes demonstruesve dhe forcave të policisë. Janë raportuar dëmtime të godinave shtetërore, djegie koshash dhe kioskash, si dhe hedhje gurësh në drejtim të efektivëve.
Policia është kundërpërgjigjur me ujë, gaz lotsjellës dhe plumba gome. Përplasjet kanë shkaktuar disa të plagosur, mes tyre protestues, të mitur, efektivë policie, gazetarë dhe kalimtarë.
Në kushtet kur ftesat për dialog nuk kanë prodhuar ende një takim mes palëve, mbetet për t’u parë nëse do të ketë një zhvillim të ri në përpjekjet për të gjetur një zgjidhje përmes bisedimeve.