CËRRIK, 29 shtator 2026 /Albania Express News/- Një 18-vjeçar është arrestuar nga Policia e Elbasanit, pasi dyshohet se aksidentoi një 14-vjeçare me motomjet, të cilin e drejtonte pa leje drejtimi, dhe më pas u largua nga vendi i ngjarjes.
Specialistët e Qarkullimit Rrugor bënë arrestimin në flagrancë të shtetasit A. N., 18 vjeç, banues në Belsh, për veprat penale “Shkelja e rregullave të qarkullimit rrugor” dhe “Largimi nga vendi i aksidentit”.
Sipas Policisë, ngjarja ka ndodhur sot rreth orës 13:10, në fshatin Shalës, në bashkinë Cërrik. 18-vjeçari dyshohet se, ndërsa drejtonte motomjetin pa leje drejtimi, ka aksidentuar një 14-vjeçare dhe më pas është larguar nga vendi i aksidentit.
Pas marrjes së njoftimit, shërbimet e Policisë kanë reaguar menjëherë, duke bërë të mundur identifikimin, lokalizimin, kapjen dhe arrestimin e të riut.
Ndërkohë, 14-vjeçarja e aksidentuar është transportuar në spital, ku ndodhet nën kujdesin e mjekëve.
Materialet procedurale i janë referuar Prokurorisë për veprime të mëtejshme.