SHKODËR/TIRANË, 26 shtator 2026 /Albania Express News/- Strukturat operacionale dhe hetimore të Policisë së Shtetit, në bashkëpunim me BKH-në dhe nën drejtimin e Prokurorisë së Posaçme (SPAK), kanë finalizuar operacionin policor të koduar “Muri i Lartë”, në kuadër të një hetimi për veprimtari kriminale të lidhur me trafikimin e lëndëve narkotike dhe grupin e strukturuar kriminal.
Operacioni është zhvilluar në qytetet Shkodër dhe Tiranë, me pjesëmarrjen e Forcave Speciale RENEA, Drejtorisë së Forcës së Posaçme Operacionale, Drejtorisë për Hetimin e Narkotikëve, DVP Shkodër dhe BKH-së.
Në kuadër të operacionit është ekzekutuar masa e sigurimit “Arrest me burg” ndaj shtetasit Bledar Cafi, 50 vjeç, lindur dhe banues në Shkodër.
Cafi është kapur në orët e para të mëngjesit të sotëm në banesën e tij në Shkodër. Sipas Policisë, ai konsiderohet person me rrezikshmëri të lartë shoqërore.
Gjykata e Posaçme e Shkallës së Parë për Korrupsionin dhe Krimin e Organizuar, më 25 shtator 2026, ka caktuar ndaj tij masën e sigurimit “Arrest me burg” për veprat penale “Trafikim i lëndëve narkotike”, kryer në bashkëpunim, në formën e grupit të strukturuar kriminal, si dhe “Grup i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.
Kontrollet për Endrit Doklen
Në zbatim të të njëjtit vendim të GJKKO-së, autoritetet kanë ushtruar kontrolle në ambiente dhe prona që lidhen me Endrit Doklen, 43 vjeç, lindur në Kukës dhe banues në Tiranë.
Dokle është person në kërkim që prej vitit 2024 dhe ndaj tij GJKKO ka caktuar masën e sigurimit “Arrest me burg” për të njëjtat vepra penale që lidhen me trafikimin e lëndëve narkotike dhe veprimtarinë e grupit të strukturuar kriminal.
Gjatë kontrolleve të zhvilluara nga strukturat e Policisë së Shtetit, Endrit Dokle nuk është gjetur.
Ai vijon të jetë në kërkim, ndërsa autoritetet kanë intensifikuar punën për lokalizimin dhe kapjen e tij.
Operacioni “Muri i Lartë” është zhvilluar nën drejtimin e SPAK dhe në zbatim të urdhrave të Prokurorisë së Posaçme dhe vendimeve të Gjykatës së Posaçme.