TIRANË, 14 shtator 2026 /Albania Express News/ – Me nisjen e vitit të ri shkollor 2026–2027, kryeministri Edi Rama ka përcjellë një mesazh urimi për nxënësit, mësuesit, drejtuesit e shkollave dhe prindërit në të gjithë vendin.
Në një postim në rrjetet sociale, Rama ka ndarë edhe pamje nga disa prej shkollave të rikonstruktuara apo të përmirësuara gjatë këtij viti, duke vënë në fokus kushtet dhe standardet e reja të mjediseve shkollore.
“Mirëmëngjes! Dhe me urimin për një vit të mbarë shkollor nxënësve, mësuesve, drejtuesve të shkollave, e padyshim edhe vetë prindërve që sot nisin fëmijët në shkollë, ju uroj të gjithëve një javë sa më të mirë”, shprehet kryeministri Rama.
Viti i ri shkollor nis këtë 14 shtator në të gjithë vendin, me mijëra nxënës që rikthehen në bankat e shkollës, ndërsa për shumë fëmijë kjo është dita e parë e tyre në arsimin parauniversitar.
Fillimi i vitit të ri shkollor shoqërohet edhe me sfidat e përvitshme për sistemin arsimor, nga infrastruktura dhe cilësia e mësimdhënies, te siguria në shkolla dhe mbështetja për nxënësit e mësuesit.