ELBASAN, 6 shtator 2026 /Albania Express News/-Drejtoria Vendore e Policisë Elbasan ka reaguar në lidhje me një postim të publikuar në portalin “JOQ”, ku pretendohej për një rast dhune të ndodhur në qytetin e Gramshit.
Sipas Policisë, ngjarja është regjistruar më 2 shtator 2026, rreth orës 20:00, ndërsa rreth një orë më vonë, një 40-vjeçar është paraqitur në Komisariatin e Policisë Gramsh për të bërë kallëzim.
Në dëshminë e tij, 40-vjeçari, i identifikuar me inicialet A. Ç., ka deklaruar se ishte goditur me një send të fortë, konkretisht me hekur, nga një 44-vjeçar, gjithashtu me inicialet A. Ç.. Sipas kallëzimit, ngjarja dyshohet të ketë ndodhur për motive të dobëta.
Pas marrjes së kallëzimit, specialistët e Komisariatit të Policisë Gramsh kanë nisur menjëherë veprimet hetimore dhe procedurale për dokumentimin e plotë të ngjarjes dhe sqarimin e rrethanave.
Në vijim të hetimeve, materialet procedurale janë referuar në Prokurori dhe ndaj 44-vjeçarit ka nisur procedimi penal për veprën penale “Plagosje e lehtë me dashje”.
Policia bën me dije se, pas veprimeve të kryera nga specialistët e Komisariatit të Policisë Gramsh, 44-vjeçari është lënë i lirë, ndërsa materialet i janë përcjellë Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.
Drejtoria Vendore e Policisë Elbasan thekson se çdo kallëzim apo denoncim trajtohet me seriozitet dhe objektivitet, në përputhje me procedurat dhe legjislacionin në fuqi.
Sipas Policisë, qëllimi i veprimeve hetimore është zbardhja e plotë e rrethanave të ngjarjes dhe vendosja përpara përgjegjësisë ligjore e çdo personi që rezulton përgjegjës.