Protestë dhe peticion, banorët e Divjakës prej 10 ditësh në shesh: “Mos na shkrini bashkinë!”

Nga Sara Tarko

DIVJAKË ,10 gusht 2026/Albania Express News/- Prej dhjetë ditësh, banorët e Divjakës vijojnë protestën kundër projektit për shkrirjen e Bashkisë Divjakë dhe bashkimin e saj me Bashkinë Lushnjë. Edhe mbrëmjen e së dielës, pavarësisht ditëve të njëpasnjëshme të protestës, qytetarët janë rikthyer në shesh për të përsëritur kundërshtimin e tyre dhe për të kërkuar që Divjaka të vijojë të jetë njësi më vete e pushtetit vendor.

Protesta tashmë është kthyer në një qëndresë të përditshme të banorëve, të cilët shprehen se nuk do të tërhiqen nga kërkesa e tyre për ruajtjen e Bashkisë Divjakë si institucion i pushtetit vendor.

Me pankarta, thirrje dhe marshime në rrugët e qytetit, protestuesit kanë përcjellë mesazhin e tyre kundër çdo skenari që, sipas tyre, do të çonte në shkrirjen e bashkisë. Ata kërkojnë që zëri i komunitetit të merret në konsideratë dhe që çdo ndryshim i mundshëm i hartës administrative të mos bëhet pa konsultim dhe pa marrë parasysh vullnetin e banorëve.

Peticioni, paralelisht me protestën

Krahas protestës, prej disa ditësh në Divjakë vijon edhe mbledhja e firmave për një peticion që pritet t’u dërgohet institucioneve shtetërore.

Banorët po firmosin dokumentin si një tjetër mënyrë për të formalizuar kundërshtimin e tyre ndaj projektit. Për ta, ruajtja e Bashkisë Divjakë nuk është vetëm një çështje administrative, por lidhet drejtpërdrejt me përfaqësimin e komunitetit, ofrimin e shërbimeve dhe zhvillimin e zonës.

“Mos shuarja e Bashkisë Divjakë” mbetet kërkesa kryesore që bashkon protestuesit, ndërsa peticioni synon t’u përcjellë institucioneve qëndrimin e qytetarëve të kësaj zone.

Protesta nuk ndalet as të dielën

Edhe pse ishte mbrëmje e së dielës, protesta nuk e ka ulur ritmin. Banorët janë mbledhur sërish në shesh, duke dëshmuar se qëndresa e tyre tashmë ka hyrë në ditën e dhjetë.

Në fund të protestës u zhvillua edhe rituali i përditshëm i banorëve: marshimi në rrugët e qytetit.

Protestuesit kanë vijuar ecjen në grup, duke përcjellë mesazhin e tyre nëpër rrugët e Divjakës dhe duke e mbyllur kështu edhe ditën e dhjetë të protestës.

“Do të vazhdojmë deri në plotësimin e kërkesës”

Banorët paralajmërojnë se protesta do të vijojë edhe në ditët në vazhdim dhe se nuk kanë ndërmend të ndalen deri në marrjen e një përgjigjeje për kërkesën e tyre.

Për komunitetin protestues, objektivi është i qartë: ruajtja e Bashkisë Divjakë dhe mosshkrirja e saj me Bashkinë Lushnjë.

Pas dhjetë ditësh protestë, sheshi i Divjakës vijon të mbetet pika ku banorët mblidhen çdo mbrëmje për të kundërshtuar projektin, ndërsa paralelisht vijon edhe mbledhja e firmave në peticion.

Tashmë pritet që qëndrimi i banorëve dhe peticioni i tyre të mbërrijnë në institucionet përkatëse, ndërsa protesta pritet të vijojë nëse nuk ka një reflektim ndaj kërkesës së komunitetit.

LËR NJË KOMENT

Shkruani komentin
Vendosni emrin tuaj

Ndaje me miqte

Lajmet e fundit

LAJME TË NGJASHME

Kufizime të reja për protestat/ Komisioni miraton kufizimet për tubimet, opozita: Do t’i çojmë në Kushtetuese

TIRANË , 19 nëntor 2026/Albania Express News/-Vetëm me një...

Policia e Shtetit certifikon punonjësit për sigurinë në shkolla, në shqip edhe platforma europiane Help4You

TIRANË , 19 nëntor 2026/Albania Express News/-Punonjësit  e Policisë...

Buxheti 2027 miratohet nen për nen vetëm me votat e PS-së në komisione, 8 institucione kërkojnë fonde dhe staf shtesë

TIRANË , 19 nëntor 2026/Albania Express News/-Pas miratimit në...