DIVJAKË ,07 gusht 2026 / Albania Express News/-Protesta e banorëve të Divjakës kundër ndryshimeve të propozuara në ndarjen territoriale ka hyrë sot në ditën e saj të tetë. Edhe gjatë mbrëmjes së kësaj të premteje, dhjetëra banorë të qytetit dhe njësive administrative përreth janë mbledhur sërish për të shprehur kundërshtimin ndaj projektit që parashikon bashkimin e Bashkisë Divjakë me Bashkinë Lushnje.
Që prej ditës së parë të protestës, mesazhi i banorëve ka mbetur i njëjtë: “Divjaka Bashki!”. Ata kërkojnë që njësia vendore të ruajë statusin e saj si bashki më vete, duke argumentuar se Divjaka ka identitetin, historinë, resurset ekonomike dhe potencialin e saj zhvillimor.
Në protestën e mbrëmjes së sotme, mikrofoni ka qenë i hapur për të gjithë qytetarët që kanë dashur të shprehin qëndrimin e tyre. Pavarësisht zërave të ndryshëm, kërkesa e përbashkët e protestuesve ka qenë vetëm një: mos shkrirja e Bashkisë Divjakë dhe mos bashkimi i saj me Lushnjen.
Një nga momentet e protestës ka qenë edhe djegia simbolike e kartave të anëtarësisë së Partisë Socialiste nga disa prej pjesëmarrësve, si shenjë pakënaqësie ndaj vendimmarrjeve të mazhorancës për reformën territoriale.
Ndërkohë, organizatorët kanë nisur mbledhjen e firmave për një peticion që do t’u drejtohet institucioneve shtetërore. Përmes këtij dokumenti kërkohet anulimi i projektit të reformës që parashikon bashkëngjitjen e Bashkisë Divjakë me Bashkinë Lushnje.
Protestuesit deklarojnë se do të vijojnë qëndrimin e tyre deri në marrjen e një përgjigjeje për kërkesën e tyre, ndërsa çdo mbrëmje protesta mbyllet me një marshim në rrugët e qytetit të Divjakës, ku qytetarët përsërisin thirrjen e tyre: “Divjaka Bashki!”.Ndërsa disa dogjën publikisht teserën e PS ndërsa zhvillohej protesta .