Kryetari i Bashkisë Elbasan, Gledian Llatja, pa nga afër vijimin e punimeve për ndërtimin e Auto Moto Park, një projekt madhor që pritet të transformojë infrastrukturën automobilistike në vend dhe të sjellë një zhvillim të rëndësishëm ekonomik për qytetin.
Aktualisht, kanë nisur punimet për nivelimin e sheshit dhe ndërtimin e Qendrës Multifunksionale të Automotorizimit, e cila do të ofrojë mbi 245,000 shërbime çdo vit për 105,000 drejtues mjetesh në qark.
Paralelisht, Bashkia Elbasan po investon në përmirësimin e rrugës “Gjergj Arianiti”, ku po ndërtohen trotuare, ndriçim modern, korsi biçikletash dhe një panoramë e veçantë përgjatë lumit Shkumbin.
Kryebashkiaku Gledian Llatja u shpreh se “Auto Moto Park do të sjellë përfitime të drejtpërdrejta për qytetarët, si shërbime moderne dhe lehtësim në qarkullim, por njëkohësisht është një investim i së ardhmes që do të kthejë Elbasanin në qendër të automobilizmit dhe turizmit në Shqipëri.”
Ky është vetëm fillimi i një vizioni që synon ta kthejë Elbasanin në qendër të automobilizmit dhe turizmit modern në Shqipëri.
Auto Moto Park Elbasan është konceptuar si një qendër kombëtare për shërbimet e automotorizimit dhe sportin automobilistik. Investimi synon të gjenerojë impakt të madh ekonomik për qytetin, duke krijuar vende të reja pune, tërhequr turistë dhe forcuar profilin e Elbasanit.
