BOTËRORI 2026 ,11 korrik 2026/Albania Express News/-Moti rikthehet të jetë një protagonist i padëshiruar për Anglinë në këtë Kampionat Botëror.
Pasi stuhitë vonuan nisjen e ndeshjes së tyre në 1/16-at kundër Meksikës, kushtet atmosferike pritet të ndikojnë sërish, këtë herë në prag të çerekfinales vendimtare.
Një paralajmërim për mot të ashpër dhe të nxehtë ekstrem është lëshuar përpara sfidës së mbrëmjes së sotme, ku Anglia do të përballet me një ekip norvegjez mjaft të rrezikshëm, me të dyja skuadrat që kërkojnë me çdo kusht një biletë për në gjysmëfinalet e Botërorit.
Fillimisht, parashikimet flisnin për prani të vetëtimave në Majami gjatë ditës së ndeshjes. Sipas rregullores, çdo shkarkesë elektrike në një rreze prej 8 miljesh nga stadiumi “Hard Rock” do të detyronte marrjen e menjëhershme të masave të sigurisë dhe bllokimin e tifozëve, çka do të sillte sërish vonesa të ngjashme me ato në Mexico City. Fatmirësisht, ky rrezik duket se është shmangur dhe stuhitë pritet të kenë kaluar përpara se skuadrat të zbresin në fushë.
Qiell i pastër, por kushte ferri
Megjithatë, mungesa e rrebesheve nuk do të thotë kushte ideale për futboll. Përkundrazi. Temperaturat në momentin e zhvillimit të ndeshjes pritet të jenë 33°C, por me një ndjesi reale prej plot 44°C dhe një lagështi ekstreme prej 59%. Ky kombinim pritet të krijojë një atmosferë mbytëse dhe shteruese për energjitë e lojtarëve në fushën e blertë.
I vetmi ngushëllim për “Tre Luanët” është fakti se po luajnë kundër njërit prej të vetmeve shtete të mbetura në garë që ka një klimë zakonisht më të ftohtë se ajo britanike. Rrjedhimisht, pritet që të dyja kampet të vuajnë njëlloj pasojat e këtij të nxehti përvëlues, në një ndeshje ku rezistenca fizike do të vlejë po aq sa taktika.