Drejtori i Përgjithshëm i Policisë së Shtetit, Ilir Proda, shprehu sot mirënjohjen e tij për pesë efektivët e policisë të cilët u dekoruan nga Kryeministri Edi Rama për angazhimin e tyre në përballjen me situatën e zjarreve gjatë verës.
Përmes një postimi në rrjetet sociale, Proda theksoi se ndihet krenar për sakrificën, përgjegjshmërinë, guximin dhe humanizmin që këta punonjës treguan në mbrojtje të jetës së qytetarëve.
“Këta pesë punonjës policie, të dekoruar nga Kryeministri i vendit, përballë flakëve të zjarreve treguan guxim, sakrificë dhe përkushtim deri në rrezikimin e jetës së tyre”, shkruan Proda.
Ai nënvizoi se efektivët e dekoruar janë fytyra e vërtetë e Policisë së Shtetit, një shembull që frymëzon dhe bën krenarë të gjithë qytetarët.
“Krahas tyre, mijëra burra e gra, djem e vajza të Policisë së Shtetit sakrifikojnë çdo ditë në përmbushje të misionit të vështirë dhe fisnik: mbrojtjen e jetës me jetën e tyre”, shtoi Proda.
Ky nderim vjen si një simbol i përkushtimit të vazhdueshëm të Policisë së Shtetit në shërbim të qytetarëve dhe në përballje me situata të jashtëzakonshme si zjarret e verës.