NGA FATMIR POPJA
TIRANË ,1 korrik 2026/Albania Express News/-Në një atmosferë solemne, të mbushur me emocion, vlerësim dhe mesazhe për paqen, dialogun dhe shërbimin ndaj shoqërisë, në mjediset e Ambasadës së Paqes në Tiranë u zhvillua veprimtaria me temë “Qeverisja e Mirë dhe Sfidat e Saj”, organizuar nga Federata e Paqes Universale dhe Këshilli Rajonal i Paqes Tiranë.
Aktiviteti mblodhi rreth 120 personalitete të jetës publike, Ambasadorë për Paqe, akademikë, përfaqësues institucionesh, biznesmenë, gazetarë, artistë dhe të ftuar nga Shqipëria, Kosova dhe diaspora shqiptare, duke u shndërruar në një tribunë të rëndësishme për promovimin e vlerave universale të paqes, bashkëpunimit dhe përgjegjësisë qytetare.
Veprimtaria u moderua me profesionalizëm nga gazetari i njohur, “Mjeshtër i Madh”, njëherazi Kryetar i Federatës së Paqes Universale për Shqipërinë, Defrim Methasani, ndërsa të pranishmit i përshëndeti Kryetari i Këshillit Rajonal të Paqes Tiranë, avokati Kastriot Selita, i cili ndau reflektime mbi rëndësinë e qeverisjes së mirë si një mision në shërbim të qytetarëve.
Atmosfera u pasurua nga interpretimet artistike të këngëtarit të njohur tiranas Ridvan Gjuzi (Vani) dhe artistes Albana Barçi, ndërsa Sekretari i Përgjithshëm i Federatës së Paqes Universale, Gani Rroshi, prezantoi misionin dhe aktivitetin e organizatës në promovimin e paqes dhe dialogut ndërkombëtar.
Kulmi i ceremonisë ,sipërmarrësit ,Gazmend Cufaj (Sufaj) i akordohet titulli “Ambasador për Paqe”
Momenti më i rëndësishëm i aktivitetit ishte ceremonia solemne e ndarjes së titullit prestigjioz “Ambasador për Paqe” për dhjetë personalitete të spikatura nga fusha të ndryshme të jetës publike.
Ndër emrat që morën këtë vlerësim të lartë ishte edhe sipërmarrësi dhe humanisti i njohur i diasporës shqiptare në Mbretërinë e Bashkuar, Gazmend Cufaj (Sufaj).
Propozimi për këtë vlerësim u bë nga Revista Albanian Post London dhe gazetari, studiuesi e pedagogu në London South Bank University, Fatmir Terziu, të cilët evidentuan kontributin shumëvjeçar të Gazmend Cufajt në zhvillimin e sipërmarrjes shqiptare në Britaninë e Madhe, në mbështetjen e komunitetit shqiptar dhe në veprimtarinë e tij të vazhdueshme humanitare.
Gjatë dorëzimit të titullit, drejtuesit e Federatës së Paqes Universale vlerësuan figurën e tij si një model frymëzues të shqiptarit që ka arritur sukses falë punës, ndershmërisë dhe përkushtimit.
“Kemi nderin të vlerësojmë një personalitet të spikatur të komunitetit shqiptar në Mbretërinë e Bashkuar, një njeri që me punë të ndershme, vizion dhe këmbëngulje ka ndërtuar një histori suksesi, duke mos harruar kurrë rrënjët dhe njerëzit e tij”, u tha gjatë ceremonisë.
Një histori frymëzuese që nis nga Puka
Gazmend Cufaj (Sufaj) lindi më 19 prill 1976, në fshatin Truen të rrethit të Pukës.
Fëmijëria e tij u zhvillua në një periudhë të vështirë të historisë së Shqipërisë, por pikërisht sfidat e asaj kohe forcuan karakterin, disiplinën dhe dëshirën për të ndërtuar një të ardhme më të mirë.
Shkollimin fillor dhe tetëvjeçar e kreu në shkollën e fshatit Blerim, ku spikati si një ndër nxënësit më të mirë. Edhe pse ëndërronte të ndiqte Shkollën Ushtarake “Skënderbej”, rrethanat e kohës nuk ia mundësuan menjëherë këtë rrugë.
Në vitin 1990 u bë pjesë e Shkollës “Skënderbej” në Tiranë dhe më pas vazhdoi studimet në Gjimnazin e Pukës.
Emigracioni dhe ngritja në Britaninë e Madhe
Si mijëra shqiptarë të viteve ’90, edhe Gazmend Cufaj mori rrugën e emigracionit.
Fillimisht punoi në Athinë, ndërsa më 4 mars 1999 u vendos në Londër, ku nisi një kapitull të ri të jetës së tij.
Në Mbretërinë e Bashkuar ai investoi vazhdimisht në formimin profesional, duke përfunduar një sërë kualifikimesh ndërkombëtare në fushat e sigurisë, elektricitetit, teknologjisë së informacionit, administrimit financiar, përpunimit të drurit dhe menaxhimit të sigurisë në aktivitete sportive e publike.
Për 13 vite punoi në industrinë e sigurisë, ndërsa për 6 vite ishte pjesë e stafit të sigurisë së klubit të njohur anglez West Ham United, ku fitoi reputacion për korrektësi, profesionalizëm dhe përgjegjësi.
Sipërmarrës i suksesshëm
Në vitin 2004 themeloi kompaninë Big Boss Services (UK) Ltd, e cila vijon të jetë një ndër sipërmarrjet e suksesshme të drejtuara prej tij në sektorin e ndërtimit.
Më pas, së bashku me bashkëshorten e tij, Ilda, krijuan kompaninë A & E Investment Properties Ltd, emërtuar sipas dy fëmijëve të tyre, Abigail dhe Ethan, duke zgjeruar aktivitetin në sektorin e investimeve në prona.
Një biznesmen me zemër humanisti
Megjithëse suksesi në biznes është i padiskutueshëm, Gazmend Cufaj është bërë i njohur edhe për angazhimin e tij të vazhdueshëm në mbështetje të komunitetit shqiptar.
Ai ka ndihmuar dhjetëra familje në nevojë, emigrantë të rinj që kërkonin të integroheshin në Britani, si dhe ka qenë pjesë e shumë nismave bamirëse.
Një nga kontributet më domethënëse ishte pas tërmetit tragjik të vitit 2019 në Durrës, kur ai u angazhua në organizimin dhe dërgimin e ndihmave për familjet e prekura, duke mobilizuar edhe diasporën shqiptare në Mbretërinë e Bashkuar.
Përmes mbështetjes financiare, ndihmës materiale dhe solidaritetit njerëzor, ai u kthye në një nga figurat më aktive të komunitetit shqiptar në Britani.
Kontributi i tij është vlerësuar edhe më parë, ndërsa në vitin 2024 u nderua me Certifikatë Vlerësimi nga Revista Albanian Post London, si mirënjohje për veprimtarinë e tij komunitare dhe humanitare.
Fjalimi prekës i Gazmend Cufajt(Sufaj)
Pas marrjes së titullit “Ambasador për Paqe”, Gazmend Cufaj (Sufaj) mbajti një fjalim që u prit me duartrokitje të gjata nga të pranishmit.
“Ky është një nga momentet më të rëndësishme të jetës sime. E marr këtë titull me shumë përulësi dhe me bindjen se ai nuk është vetëm një nder për mua, por një përgjegjësi edhe më e madhe.
Unë vij nga një fshat i vogël i Pukës, ku mësova se puna e ndershme, respekti për njerëzit dhe fjala e dhënë vlejnë më shumë se çdo pasuri. Jeta më çoi në emigracion, ku nisa gjithçka nga e para. Nuk ishte e lehtë, por çdo sfidë më mësoi të mos dorëzohesha kurrë.
Sot dua të falënderoj familjen time, bashkëshorten Ilda dhe fëmijët e mi Abigail dhe Ethan, të cilët kanë qenë forca ime në çdo hap. Falënderoj gjithashtu të gjithë miqtë, bashkëpunëtorët dhe komunitetin shqiptar në Britaninë e Madhe që më kanë mbështetur gjatë gjithë këtij rrugëtimi.
Ky titull më motivon të vazhdoj të jem pranë njerëzve në nevojë, të ndihmoj të rinjtë, të mbështes komunitetin shqiptar dhe të punoj gjithmonë për paqen, mirëkuptimin dhe bashkëpunimin.
Besoj se suksesi nuk matet vetëm me atë që arrin për veten, por mbi të gjitha me atë që lë pas për të tjerët. Paqja fillon nga zemra e secilit prej nesh dhe ndërtohet çdo ditë me respekt, dashuri dhe solidaritet.
Ky vlerësim i përket familjes sime, komunitetit shqiptar dhe çdo njeriu që beson se me punë, ndershmëri dhe humanizëm mund të bëjmë një botë më të mirë.”
Një ambasador i vlerave shqiptare
Emërimi i Gazmend Cufajt (Sufaj) si “Ambasador për Paqe” përfaqëson jo vetëm një vlerësim të merituar për arritjet e tij profesionale, por edhe një mirënjohje për modelin që ai mishëron: një shqiptar që, pavarësisht suksesit në emigracion, nuk i ka harruar kurrë rrënjët, komunitetin dhe përgjegjësinë ndaj shoqërisë.
Historia e tij është dëshmi se puna, integriteti, solidariteti dhe përkushtimi ndaj njerëzve mbeten vlerat më të mëdha që mund të ndërtojnë ura mirëkuptimi mes komuniteteve dhe të shërbejnë si frymëzim për brezat e rinj shqiptarë, brenda dhe jashtë vendit.
