TIRANË, 7 maj 2026 /Albania Express News/ Ministri i Shtetit për Pushtetin Vendor, Ervin Demo priti sot ambasadoren e Austrisë në Shqipëri, Monika Zach, së bashku me një delegacion të përbërë nga 14 kryetarë bashkish dhe rreth 60 përfaqësues të nivelit drejtues të pushtetit vendor austriak, të kryesuar nga presidenti i Shoqatës Austriake të Bashkive, Johannes Pressl.
Gjatë takimit u diskutua mbi rolin e pushtetit vendor në procesin e integrimit europian, forcimin e kapaciteteve të bashkive dhe zgjerimin e bashkëpunimit ndërmjet njësive vendore shqiptare dhe austriake.
Ministri Demo vlerësoi përvojën e Austrisë në qeverisjen vendore, bashkëpunimin ndërbashkiak dhe përfshirjen e bashkive në proceset europiane, duke e cilësuar atë një model të vlefshëm për Shqipërinë në kuadër të rrugëtimit drejt anëtarësimit në Bashkimin Europian.
Në fokus të bisedimeve ishte edhe nxitja e shkëmbimit të praktikave më të mira dhe thellimi i partneriteteve ndërmjet bashkive të të dy vendeve.