TIRANË,30 prill 2026/Albania Express News/Shqipëria ka humbur tre pozicione në raportin e përvitshëm të Reporterëve Pa Kufij për lirinë e medias.
Një vit më parë vendi ynë renditej në vendin e 80 nga 180 vende, ndërsa tani renditet në vendin e 83-të.
Në raport thuhet se në Shqipëri, gazetarët janë viktima të rasteve të frikësimit nga politikanët dhe krimi i organizuar.
“Gazetarët kritikë ndaj autoriteteve shpesh sulmohen me qëllim diskreditimi si nga qeveria ashtu edhe nga opozita, dhe hasin vështirësi në marrjen e informacionit shtetëror, qasja në të cilin mund të kufizohet edhe më shumë nga një centralizim i fundit i komunikimeve qeveritare”, thuhet në raport.
Reporterët Pa Kufij janë ndalur gjithashtu edhe te vendimi i Qeverisë për të bllokuar Tik-Tok në Shqipëri.
“Megjithëse kushtetuta e Shqipërisë dhe angazhimet ndërkombëtare garantojnë lirinë e shtypit, mbrojtja e konfidencialitetit të burimeve është e pamjaftueshme. Si rezultat i vendimeve gjyqësore të diskutueshme, disa media janë ndaluar të mbulojnë çështje sensitive me interes publik. Vendimi i qeverisë për të bllokuar TikTok në vitin 2025 ka shkelur lirinë e shprehjes dhe të shtypit, sipas Gjykatës Kushtetuese. Megjithëse ende i paplotë, dekriminalizimi i shpifjes pritet të ketë ndikim pozitiv në lirinë e medias”, vijon më tej raporti.