Syri i Kaltër, Park Natyror në jug të vendi, vazhdon të tërheqë vizitorë edhe në ditët e fundit të shkurtit, duke ruajtur statusin e destinacionit kryesor për pasionantët e natyrës.
Ministri i Mjedisit, Sofjan Jaupaj, tha se, gjatë vitit 2025 Syri i Kaltër priti 226 mijë vizitorë, nga të cilët 156 mijë ishin turistë të huaj, të cilët u larguan me përshtypje pozitive për Shqipërinë.
Ai shtoi se bashkë me ekipin e Administratës së Zonave të Mbrojtura Vlorë po sigurohet që bukuria e parkut të mbetet e paprekur, duke ofruar një eksperiencë ekoturistike të nivelit të lartë, në harmoni me biodiversitetin dhe traditën lokale.
Syri i Kaltër është një burim natyror i ujit në afërsi të qytetit të Sarandës, në jug të Shqipërisë, në rajonin e Vlorës. Ai është i njohur për ngjyrën karakteristike të kaltër të ujit dhe për fuqinë e burimit që formon liqene të vogla dhe kanale natyrore.
Parku natyror rreth burimit është një destinacion i njohur për vizitorët dhe turistët, ku mund të shijohet natyra, bimësia e pasur dhe biodiversiteti i zonës. Syri i Kaltër ofron gjithashtu mundësi për fotografi natyrore, ecje dhe aktivitete ekoturistike, duke kombinuar bukurinë e ujit me peizazhet e gjelbërta dhe lumenjtë përreth.
Si një nga zonat më të bukura të vendit, Syri i Kaltër konsiderohet edhe një atraksion kryesor turistik në jug të Shqipërisë, veçanërisht gjatë sezonit veror, por edhe në muajt e tjerë, si shkurt, kur vizitorët e apasionuar nga natyra vijnë për të shijuar peizazhin unik.