Këshilli i Ministrave miratoi sot ndryshime në vendimin nr. 328, datë 31 maj 2023, që përcakton klasifikimin e funksioneve, grupimin e njësive të vetëqeverisjes vendore për efekt page, si dhe kufijtë e pagave të funksionarëve të zgjedhur, nëpunësve civilë dhe punonjësve administrativë.
Sipas vendimit të ri, kufijtë e pagave bazë për punonjësit administrativë të njësive të vetëqeverisjes vendore përcaktohen nga 50.000 deri në 57.000 lekë në muaj.
Ndër të tjera, janë rishikuar edhe kufijtë minimalë dhe maksimalë të elementit “Pagë për pozicion” për të gjitha klasat, si rezultat i indeksimit me 2,5% dhe i politikës së rritjes së pagave.
Efektet financiare për vitin 2026 do të mbulohen nga transferta e akorduar për njësitë e vetëqeverisjes vendore, si dhe nga të ardhurat e veta të këtyre njësive, sipas ligjit nr. 87/2025, “Për buxhetin e vitit 2026”.
Vendimi hyn në fuqi pas botimit në “Fletoren Zyrtare” dhe ka efekt që nga 1 janari 2026. Njësitë e vetëqeverisjes vendore janë ngarkuar me zbatimin e tij, në funksion të përmirësimit të kushteve financiare të punonjësve dhe harmonizimit të pagave në nivel vendi.