Fjala e trajnerit Ilir Daja pas fitores 3-1 kundër Hajduk Split në “Air Albania”:
“Të gjithë ishim të përlotur. Ishte një mbrëmje historike për futbollin shqiptar, për historinë e Dinamos. Kishim përballë Hajdukun me 200 ndeshje në arenën europiane. Kemi prezantuar në mënyrën më të mirë futbollin e klubeve të Shqipërisë.
E merituan çunat, presidenti, ka qenë super korrekt. E meritojmë edhe ne si staf. Edhe puna jonë është pjesë e rezultatit në shumatoren që përmenda.
Më duhet të dal nga vetja, përtej modestisë që më karakterizon. Do më vinte shumë keq. Në të gjithë ndeshjen ishim me shumë raste në krahasim me Hajdukun. Më bënte të besoja sjella e çunave në fushë. Filluam ta menaxhonim lojën, frika nuk është prezent, kur e menaxhon lojën. Në fund fare, jemi të lumtur që e bëmë historinë. Unë personalisht, e kam bërë njëherë historinë kundër Dinamo Zagreb.
Hajduku është një tjetër gjigant i futbollit kroat, me shumë histori. Të përballesh me kundërshtarë të nivelit të Hajdukut të Splitit dhe të kualifikohesh është një bonus shumë i madh psikologjik. Mund të bëjmë gjëra të mëdha si sot. Ky është bonusi më i madh. Nga ana psikologjike, lojtarët tanë hodhën një hap drejt personalitetit të shprehur në fushë.
Të festojmë, se na takon. Pastaj do të merremi me Jagellonian. E dimë që shkalla e vështirësisë është po aq e madhe sa ndaj Hajdukut. T’ia lemë fushës.”