Bashkia Cërrik ka reaguar menjëherë ndaj shqetësimit të banorëve të Lagjes Nr. 3 – Fermë, duke i dhënë fund një pike që ishte shndërruar në vendgrumbullim të paligjshëm mbetjesh. Kryetari i bashkisë, Florenc Doka, bëri të ditur përmes një postimi në rrjetin e tij social Facebook se zona ishte ndotur rëndë nga hedhja pa kriter e divaneve, mbetjeve të betonit dhe qeseve me plehra, duke dëmtuar mjedisin dhe cilësinë e jetesës së komunitetit.
Falë ndërhyrjes së shërbimeve të bashkisë, pika u pastrua plotësisht dhe normaliteti u rikthye, duke eliminuar një burim serioz ndotjeje për lagjen.
Kryebashkiaku Doka theksoi se tani është koha për përgjegjësi të përbashkët, duke shprehur besimin se banorët do të kontribuojnë në ruajtjen e pastërtisë dhe nuk do të hedhin më mbetje në këtë hapësirë.
Mjedisi është përgjegjësi e të gjithëve. Vetëm me bashkëpunim ndërtojmë një qytet më të pastër dhe më të jetueshëm,” nënvizoi ai, duke bërë thirrje për ndërgjegjësim dhe kujdes të vazhdueshëm ndaj hapësirave publike.
Ky veprim tregon angazhimin e Bashkisë Cërrik për një mjedis më të shëndetshëm dhe një qytet më të rregullt për të gjithë banorët.