Në Peqin u zhvillua panairi tradicional i Gjelit të Detit, një ngjarje që sjell në vëmendje traditën shumëvjeçare të mbarështimit të këtij shpendi, simboli kryesor i tryezës festive të Vitit të Ri.
Aktiviteti mblodhi bashkë fermerë, qytetarë dhe vizitorë, me qëllim promovimin e prodhimeve lokale dhe traditave gastronomike të zonës. I pranishëm deputeti i PS-së, Arbjan Mazniku, theksoi rëndësinë e mbështetjes së iniciativave që nxjerrin në pah potencialin rural dhe kulturor të qytetit.
Panairi, ofroi gjithashtu edhe një gamë të gjerë ushqimesh tradicionale, ku në qendër të vëmendjes ishte Gjeli i Detit, simbol i këtij aktiviteti. Vizitorët patën mundësinë të shijojnë gatime autentike të përgatitura nga komuniteti lokal, duke përfshirë edhe prodhime të tjera tradicionale të rajonit. Ngjarja synoi të promovojë traditën dhe të nxisë ndërveprimin mes prodhuesve, shkollave dhe qytetarëve.
Shkolla 9-vjeçare “Demir Godelli” në Peqin, pati një pjesëmarrje të veçantë, duke organizuar edhe një koncert me këngë dhe valle, teksa nxënësit ishin të veshur me kostume tradicionale të zonës.
Nxënësit dhe stafi shkollor prezantuan gjithashtu produktet tipike të zonës të përgatitura me kujdes, duke ofruar vizitorëve një eksperiencë të pasur gastronomike dhe kulturore.
Panairi u zhvillua në kalanë e qytetit, një ambient historik që i shtoi ngjarjes një dimension kulturor dhe turistik. Aktiviteti vuri në pah rëndësinë e ruajtjes së traditave lokale dhe bashkëpunimin mes institucioneve arsimore, komunitetit dhe fermerëve, duke kontribuar në promovimin e identitetit kulturor dhe gastronomik të Peqinit.
