I lindur në Elbasan dhe rritur me dashurinë për futbollin, Bylykbashi është një nga emrat më të mëdhenj që ka nxjerrë ky qytet. Me teknikë fine, vizion loje dhe personalitet lideri, ai u bë shpejt idhull për tifozët verdheblu dhe jo vetëm. Nga Elbasani, rrugët e tij sportive e çuan në skuadra të tjera të mëdha të futbollit shqiptar, duke u bërë një figurë frymëzuese për çdo të ri që ëndërron fushën e blertë.
Karriera e tij lidhet fort me Partizanin, ku jo vetëm ishte një nga lojtarët kryesorë, por mbajti edhe shiritin e kapitenit, duke udhëhequr ekipin me karakter dhe klas. Po ashtu, ai ka veshur fanellën e Vllaznisë, ndërsa përvoja e tij ndërkombëtare erdhi me klubin ukrainas Krivbas, ku tregoi se cilësia shqiptare mund të shkëlqejë edhe jashtë vendit.
Një pjesë e rëndësishme e historisë së tij është edhe Kombëtarja shqiptare, ku Bylykbashi dha kontributin e tij në sfida të rëndësishme, duke përfaqësuar me krenari fanellën kuqezi. Sot, në 45-vjetorin e tij, futbolli elbasanas e shqiptar kujton jo vetëm lojtarin e madh, por edhe njeriun që i dha lojës pasion, kulturë dhe respekt. Urime Dorian, dhe faleminderit për gjithçka që i dhe futbollit!
Në këtë ditë të shënuar, stafi i “Albania Express News” i shpreh urimet më të përzemërta ish futbollistit të shquar Dorian Bylykbashi, me rastin e 45-vjetorit të lindjes! Gëzuar ditëlindjen, kampion!
Me respekt, “Stafi i Albania Express News”
