Reshjet e dendura të mbrëmjes së djeshme dhe të gjithë natës kanë shkaktuar probleme të shumta edhe në bashkinë e Gramshit. Si pasojë e prurjeve të larta dhe erozionit të shkaktuar nga uji, është dëmtuar njëri krah i urës së Shëmrizës, duke krijuar vështirësi të mëdha në qarkullim.
Aktualisht, kalimi në këtë segment bëhet me shumë kujdes dhe me vështirësi, ndërsa Drejtoria e Infrastrukturës ka nisur punën për riparimin të dëmtimit dhe normalizimin e situatës. Në zonë është njoftuar edhe policia, e cila ka marrë masa për të ndaluar qarkullimin e mjeteve të rënda dhe automjeteve të tjera që mund të rrezikohen, deri në stabilizimin e plotë të urës.
Bashkia e Gramshit vijon monitorimin e situatës, ndërsa reshjet pritet të vazhdojnë, duke u bërë thirrje drejtuesve të mjeteve të shmangin kalimin në këtë segment deri në rikthimin e sigurisë maksimale.