Në Ditën Ndërkombëtare të të Drejtave të Fëmijëve, deputetja socialiste e Elbasanit, Aulona Bylykbashi, ka shpërndarë një mesazh sensibilizues në rrjetet sociale, duke theksuar rëndësinë e përkushtimit të institucioneve dhe shoqërisë ndaj mbrojtjes dhe mirëqenies së fëmijëve.
Bylykbashi nënvizon se çdo politikë dhe vendim që merret sot duhet të ketë në qendër krijimin e një të ardhmeje ku fëmijët të rriten të sigurt, të barabartë dhe të dëgjuar. “Fëmijët janë individë me të drejta të patjetërsueshme, dhe respektimi i këtyre të drejtave është detyrë e çdo institucioni dhe çdo prindi,” thekson ajo.
Deputetja shprehet se mbrojtja e fëmijëve përbën vetë themelin e ndërtimit të një shoqërie të qëndrueshme dhe me vlera. “Të mbrosh të drejtat e fëmijëve do të thotë të mbrosh pjesën më të pastër dhe më të shpresës së mbushur të botës,” shkruan Bylykbashi.
Ky apel vjen në një ditë simbolike që rikujton se investimi tek fëmijët është investim për të ardhmen e vendit, një përgjegjësi që duhet ndarë mes institucioneve, komunitetit dhe familjeve.