Në gjithë qarkun e Elbasanit reshjet e shiut kanë vijuar edhe gjatë ditës së sotme, fillimisht me intensitet të ulët, ndërsa orët e pasdites sollën një shtim të tyre drejt nivelit mesatar. Për pasojë, në disa segmente rrugore brenda qytetit të Elbasanit është shënuar prani uji, kryesisht në pika ku pusetat e ujërave të bardha kanë rezultuar të bllokuara.
Sipas komunikimeve me strukturat e Emergjencave Civile në bashkitë e qarkut, deri në orët e mbrëmjes nuk janë raportuar problematika apo situata të rënda që të kërkojnë ndërhyrje të menjëhershme.
Ndërkohë, një nga pikat që është mbajtur në vëmendje të shtuar ka qenë fshati Kërpice, Njësia Administrative Kukur në bashkinë Gramsh, ku gjatë mesditës u evidentua rrezik për dalje nga shtrati të lumit me të njëjtin emër.
Falë ndërhyrjes në kohë dhe uljes së prurjeve, situata është normalizuar plotësisht dhe në këtë moment nuk raportohet rrezik për banesat e zonës. Për të garantuar reagim të menjëhershëm në rast të ndonjë përkeqësimi të kushteve atmosferike, një fadromë e bashkisë vijon të mbetet në gatishmëri.
Institucioni i Prefektit të Elbasanit bëri të ditur se po monitoron në mënyrë të vazhdueshme gjendjen në të gjitha bashkitë, me qëllim marrjen e masave të shpejta nëse situata e motit do të përkeqësohet në orët në vijim.