Në një atmosferë të mbushur me emocion dhe simbolikë, Federata e Paqes Universale organizoi më 16 tetor 2025, në ambientet e Ambasadës së Paqes në Tiranë, një aktivitet të veçantë me rastin e 100-vjetorit të çiklizmit shqiptar, me temën: “100 Vjet Çiklizëm në Shqipëri, në rrugën e Paqes.”
Ky aktivitet përmblodhi jo vetëm rrugëtimin historik të këtij sporti fisnik në vendin tonë, por njëkohësisht vuri në pah vlerat më të thella që çiklizmi mishëron: qëndrueshmëri, përkushtim, bashkëpunim dhe paqe – mesazhe që tejkalojnë pistat sportive dhe gjejnë jehonë në çdo dimension të jetës shoqërore.
Moderimi dinjitoz i z. Defrim Methasani, Kryetar i Federatës së Paqes Universale Shqipëri, dha tonin e një aktiviteti ku emocionet, reflektimi dhe respekti për figurat që kanë ndërtuar historinë e çiklizmit u ndërthurën në mënyrë perfekte.
Aktiviteti u pasurua me fjalë përshëndetëse nga figura të rëndësishme të sportit dhe paqes. Përfaqësues të Federatës Shqiptare të Çiklizmit sollën në vëmendje sfidat, arritjet dhe figurat emblemë që e kanë ngritur këtë sport ndër breza.
Z. Leonard Tase, Nënkryetar i Këshillit të Paqes Tiranë, vuri theksin te lidhja e pandashme mes sportit dhe paqes sociale.
Dr. Lluka Heqimi, “Mjeshtër i Madh” dhe njëkohësisht “Ambasador për Paqe”, ndau me të pranishmit një rrëfim të thellë dhe të ndjerë mbi rolin e çiklizmit në formimin e karakterit dhe përhapjen e vlerave humane.
Z. Gani Rroshi, Sekretar i Përgjithshëm i Federatës së Paqes, mbajti një prezantim mbi filozofinë që qëndron në zemër të Ambasadës së Paqes. Ai theksoi se sporti është një mjet edukimi dhe transformimi, një rrugë për të ndërtuar ura mirëkuptimi në shoqëri.
Momentet më kulmore të veprimtarisë ishin padyshim ndërrimi me titullin “Ambasador për Paqe” për emra të mëdhenj të çiklizmit, të cilët me pasionin dhe integritetin e tyre kanë qenë frymëzim për breza të tërë.
Ky vlerësim përfaqëson më shumë se një çmim – ai është një njohje për ndikimin e thellë që sporti mund të ketë në ndërtimin e një shoqërie më të drejtë, më të bashkuar dhe më të paqtë.
Një program i shkurtër artistik, i ndërthurur gjatë aktivitetit, i dha eventit një tjetër dimension emocional, duke krijuar një atmosferë përbashkuese që përçoi mesazhin: “Paqja është rruga, sporti është mjeti, njeriu është qëllimi.”
Në përmbyllje, pjesëmarrësit ndanë momente reflektimi, bisedash të lira dhe ide për bashkëpunime të ardhshme, në një frymë të pastër miqësie e respekti që karakterizon çdo nismë të Federatës së Paqes Universale.
Momentet më të bukura të kësaj dite të paharruar mbeten të skalitura në kujtesën e të pranishmëve, si dëshmi e asaj se kur sporti bashkohet me misionin për paqe, krijohen kapituj të rinj në historinë tonë kolektive.
Albania Express News do të vijojë të mbështesë dhe pasqyrojë nisma të tilla, ku vlerat njerëzore vihen në qendër – për një Shqipëri më të bashkuar, më sportive dhe më paqedashëse.
