ELBASANI ,1 korrik 2026/ Albania Express News/-AF Elbasani po kalon një periudhë të vështirë në prag të sezonit të ri, pasi klubi ka zyrtarizuar largimin e tetë futbollistëve të rëndësishëm, duke krijuar boshllëqe në të gjitha repartet e skuadrës. Sipas vlerësimeve të tregut, vlera e përgjithshme e lojtarëve të larguar i kalon 2.6 milionë euro, ndërsa klubi nuk ka përfituar asnjë të ardhur nga transferimet e tyre.
Mes emrave që kanë mbyllur bashkëpunimin me verdheblutë janë Martin Janacek, Karim Loukili, Manellari, Emir Azemovic, Ze Gomes, Sigitas Olberkis, Tsague dhe Xhonatan Lajthia.
Goditja më e madhe duket në repartin ofensiv, ku largimi i goleadorëve Xhonatan Lajthia, Ze Gomes dhe Tsague i heq ekipit një pjesë të konsiderueshme të potencialit sulmues. Të tre ishin ndër protagonistët kryesorë të sezonit të kaluar, duke rezultuar vendimtarë në shumë ndeshje dhe duke u kthyer në një makth për mbrojtjet kundërshtare.
Edhe prapavija ka pësuar ndryshime të mëdha. Largimi i qendërmbrojtësve Emir Azemovic dhe Sigitas Olberkis pritet të ndikojë ndjeshëm në ekuilibrat defensivë të skuadrës, duke e detyruar stafin teknik të ndërhyjë me afrime cilësore për të rindërtuar mbrojtjen.
Në këto kushte, drejtuesit e klubit përballen me një nga merkatot më të rëndësishme të viteve të fundit. Elbasani do të duhet të rindërtojë thuajse nga e para disa reparte të skuadrës, ndërsa tifozët presin me interes lëvizjet e ardhshme, sidomos në prag të angazhimeve në sezonin e ri dhe në arenën europiane.
