Dhjetëra mijëra ullinj dhe sipërfaqe me pemëtari, vreshta e pyje u përfshinë nga zjarri , disa vatra të vogla ende aktive, zona mbetet nën monitorim
PEQIN, 4 tetor 2026 /Albania Express News/- Zjarri masiv që përfshiu disa fshatra të Bashkisë Peqin gjatë mesjavës është tashmë drejt shuarjes së plotë, pas një operacioni të gjerë të zhvilluar për disa ditë nga toka dhe ajri.
Flakët, të cilat u shfaqën fillimisht në fshatin Galush, në Njësinë Administrative Përparim, u përhapën me shpejtësi edhe në pesë fshatra të tjerë, duke përfshirë një sipërfaqe prej rreth 150 hektarësh.
Zjarri përfshiu sipërfaqe të konsiderueshme me ullinj, pemëtari, vreshta, shkurre, pyje dhe barishte, duke shkaktuar dëme të mëdha në pasuritë bujqësore dhe territorin e zonës.
Mëngjesin e kësaj të diele, situata paraqitet më e qetë. Sipas të dhënave nga terreni, janë aktive vetëm disa vatra të vogla zjarri, ndërsa pjesa më e madhe e vatrave është izoluar dhe zjarri nuk paraqet më përhapjen e ditëve të mëparshme.
Operacion masiv nga toka dhe ajri
Për shuarjen e flakëve u angazhuan forca dhe mjete të shumta, ndërsa ndërhyrja u krye si nga toka, ashtu edhe nga ajri, për shkak të përmasave të zjarrit dhe terrenit të vështirë.
Pas izolimit të vatrave kryesore, situata tashmë është vendosur nën monitorim të vazhdueshëm, me qëllim parandalimin e riaktivizimit të zjarrit në zonat e prekura.
Megjithatë, përmasat e dëmeve të shkaktuara janë të konsiderueshme. Sipërfaqja e përfshirë nga flakët dhe dëmtimi i një numri të madh pemësh frutore, ullinjsh dhe kulturash bujqësore e bëjnë këtë një nga episodet më të rënda të zjarreve të regjistruara në territorin e Bashkisë Peqin gjatë kësaj periudhe.
Bilanci i plotë pritet në ditët në vijim
Tashmë, vëmendja është përqendruar te vlerësimi i pasojave. Gjatë ditëve të ardhshme pritet të kryhet një bilanc më i plotë i dëmeve të shkaktuara në tokat bujqësore dhe sipërfaqet pyjore të përfshira nga zjarri.
Bilanci pritet të përcaktojë më saktë numrin e pemëve të dëmtuara ose të shkatërruara, sipërfaqet e prekura dhe dëmet ekonomike të shkaktuara për banorët e fshatrave të përfshirë.
Për momentin, pas ditëve të një operacioni intensiv, flakët janë izoluar, ndërsa zonat e prekura vijojnë të monitorohen për çdo riaktivizim të mundshëm.
Pas zjarrit mbetet pas një territor i gjerë i dëmtuar, me sipërfaqe të tëra ullishtesh, pemëtarish, vreshtash, shkurresh dhe pyjesh të prekura nga flakët.