GJIROKASTËR, 2 korrik 2026 /Albania Express News/-Ministrja e Arsimit, Mirela Kumbaro, njëherësh drejtuese politike e Partisë Socialiste për qarkun e Gjirokastrës, ndau sot në rrjetet sociale përshtypjet e turistëve të cilët po vizitojnë qytetin e gurtë.
Vizitorë nga vende të ndryshme të Evropës, shprehen të impresionuar nga peizazhet, plazhet dhe trashëgimia kulturore.
“Hera e parë në Shqipëri, më pëlqeu shumë natyra, është hera e parë që vizituam Gjirokastrën. Shijoni natyrën dhe historinë e këtij vendi”, tha një vizitor.
Një çift turistësh nga Zvicra tha se gjatë gjashtë ditëve të qëndrimit në Shqipëri kanë vizituar jugun e vendit, duke mbetur të mahnitur nga plazhet, ushqimi tradicional dhe mikpritja.
“Përshëndetje, jemi nga Zvicra. Kjo është hera e parë që vijmë në Shqipëri. Jemi këtu prej 6 ditësh, e filluam udhëtimin tonë në jug. Na pëlqyen shumë plazhet, natyra, ushqimi i mirë dhe mikpritja. Po e përfundojmë udhëtimin tonë në këtë qytet. Ejani në Shqipëri, është bukur, perfekte”, u shprehën ata.
Ndërkohë, një tjetër vizitor vlerësoi natyrën, kulturën dhe njerëzit.
“Natyra dhe kultura e këtij vendi, njerëzit që jetojnë këtu janë shumë të sjellshëm dhe ndihmues”, u shpreh një vizitor.
Edhe një familje nga Italia ndau përvojën e saj në Shqipëri.
“Vijmë nga Roma është hera e parë që vijmë në Shqipëri. Kemi nisur udhëtimin tonë nga Brindisi dhe mbërritëm në Vlorë. Shkuam në Sarandë, vizituam plazhin e bukur të Borshit, plazhin e Sarandës dhe të Ksamilit. Sot erdhëm të vizitonim Gjirokastrën, që është shumë tërheqëse për historinë që ka, por mbi të gjitha për kalanë”, thanë ata.