Autoriteti i Mbikëqyrjes Financiare (AMF) ka publikuar të dhënat zyrtare për ecurinë e tregut të sigurimeve për periudhën janar–gusht 2025, duke raportuar një rritje të ndjeshme si në të ardhura, ashtu edhe në numrin e kontratave të lidhura.
Sipas raportit, të ardhurat nga primet e shkruara bruto arritën në 17.9 miliardë lekë, me një rritje prej 9.53% krahasuar me të njëjtën periudhë të vitit 2024.
Ndërkohë, numri i kontratave të sigurimit u rrit me 6.12%, duke arritur në 1,116,204 kontrata gjithsej.
Tregu vijon të dominohet nga sigurimet Jo-Jetë, të cilat përbëjnë 91.57% të totalit të primeve, ndërsa sigurimet e Jetës përfaqësojnë 8.40% dhe risigurimi vetëm 0.026%.
Në ndarjen sipas llojit të sigurimit, sigurimet e detyrueshme zënë 61.84% të totalit të tregut, ndërsa sigurimet vullnetare përbëjnë 38.16%.
Nga ana tjetër, dëmet e paguara bruto gjatë kësaj periudhe arritën në 5.47 miliardë lekë, duke shënuar një ulje prej 2.27% krahasuar me janar–gusht 2024.
Në sigurimin motorik, dëmet e paguara u rritën me 2.59%, duke arritur në 4.19 miliardë lekë.
Sipas AMF-së, të dhënat pasqyrojnë një zhvillim pozitiv të tregut të sigurimeve, si në rritjen e mbulimit me sigurim, ashtu edhe në forcimin e besimit të qytetarëve dhe bizneseve ndaj këtij segmenti të rëndësishëm të sektorit financiar.