Federata Palestineze e Futbollit ka njoftuar në rrjetet sociale se ushtria izraelite ka vrarë fëmijën Mohammed Ramez Al-Sultan, lojtar i ekipit Al-Hilal Sports Club, së bashku me 14 anëtarë të familjes së tij, gjatë një sulmi të premten që kishte si objektiv banesën e tyre në Rripin e Gazës.
Sipas raportimeve të Al Jazeera, të paktën 11 persona janë vrarë që nga mëngjesi i sotëm nga sulmet izraelite në Gaza.
Ndërkohë, një njoftim urgjent për evakuim është shpërndarë në rrjetet sociale nga zëdhënësi i Forcave të Mbrojtjes së Izraelit (IDF), duke u bërë thirrje banorëve të largohen nga zona e kullës Burj Al-Nur dhe tendave përreth në rrugën Safed. Ushtria izraelite deklaroi se më pas ka goditur ndërtesën, duke pretenduar se ajo përdorej nga organizata Hamas dhe përmbante infrastrukturë ushtarake.
