Kina është në gatishmëri të lartë për shkak të mbërritjes së tajfunit supertropikal Ragasa, më i fuqishmi në botë për vitin 2025, që pritet të godasë kryesisht provincën jugore të Guangdong dhe Rajonin Special Administrativ të Hong Kongut.
Sipas mediave ndërkombëtare, mbi 400,000 njerëz janë evakuuar dhe më shumë se 700 fluturime janë pezulluar deri të enjten në mëngjes për shkak të erërave me forcë uragani, që mund të arrijnë deri në 220 km/orë.
Observatori Meteorologjik i Hong Kongut ka paralajmëruar se autoritetet janë të gatshme të rrisin nivelin e alarmin për tajfun në Nivelin 8, i treti më i lartë, deri në fillim të pasdites. Kjo ka çuar në mbylljen e shumicës së bizneseve dhe shërbimeve të transportit.
Një vlerësim i mëtejshëm do të përcaktojë nëse do të lëshohet një alarm më i lartë vonë në mbrëmjen e së martës apo herët të mërkurën, bazuar në erërat e forta në det dhe shirat e rrëmbyeshëm që pritet të shkaktojnë valë stuhie dhe përmbytje në qytet.
Ekziston një rrezik i ngjashëm me përmbytjet e regjistruara gjatë tajfuneve Hato në 2017 dhe Mangkhut në 2018, të cilat shkaktuan dëme miliardëshe. Niveli i ujit mund të rritet deri në 2 metra në zonat bregdetare të Hong Kongut dhe deri në 4-5 metra në disa zona, paralajmëron Observatori Meteorologjik.
