Ministri spanjoll i Kulturës, Ernest Urtasun, deklaroi sot se Spanja nuk duhet të marrë pjesë në edicionin e ardhshëm të festivalit të këngës në Eurovision nëse Izraeli merr pjesë. Ai nënvizoi se vendimi i fundit do të mbetet tek organizatori i Eurovisionit, Bashkimi Evropian i Transmetimeve (EBU), ndërsa shtoi se vendime të ngjashme janë marrë tashmë nga Irlanda, Sllovenia, Islanda dhe Holanda.
Në Asamblenë e Përgjithshme të EBU-së në korrik, disa vende shprehën shqetësime për pjesëmarrjen e Izraelit në edicionin e vitit 2026, i cili do të mbahet në Vjenë. EBU lejoi tërheqjen nga konkursi deri në mesin e dhjetorit pa penalitete financiare, duke lënë hapësirë për vendime të tilla politike. Kryeministri spanjoll, Pedro Sanchez, ka deklaruar më parë se Izraeli duhet të përjashtohet nga Eurovision, nga solidariteti me popullin palestinez që po përjeton pasojat e luftës dhe bombardimeve.
Spanja, e cila njohu shtetin e Palestinës më 28 maj 2024, është shfaqur si një nga zërat më kritikë të Bashkimit Evropian ndaj qeverisë së Benjamin Netanyahut. Në muajt e fundit, Sanchez ka shprehur gjithashtu mbështetjen për protestat pro-Palestinë, duke përfshirë ndërprerjen e njohur të garës së çiklizmit spanjoll “La Vuelta” nga demonstruesit.
