PEQIN,2 qershor 2026/Albania Express News/ Rritja e standardeve të sigurisë dhe garantimi i një mjedisi të qetë e të kontrolluar brenda institucionit kanë qenë në qendër të një instruktazhi të rëndësishëm të zhvilluar këtë të martë në ambientet e IEVP Peqin. Aktiviteti u drejtua nga Drejtori i institucionit z.Altin Ago , i cili zhvilloi një takim pune me forcat e policisë së burgut, duke vënë theks të veçantë te forcimi i masave të sigurisë në territorin e brendshëm të institucionit.
Gjatë këtij instruktazhi u diskutuan çështje të rëndësishme që lidhen me ruajtjen e rendit, gatishmërinë operacionale dhe përmirësimin e mëtejshëm të koordinimit mes strukturave të sigurisë. Drejtori i IEVP Peqin theksoi se vigjilenca e vazhdueshme, profesionalizmi në kryerjen e detyrës dhe bashkëpunimi i ngushtë ndërmjet efektivëve mbeten elementë kyç për garantimin e një institucioni të sigurt dhe funksional.
Në fjalën e tij, ai nënvizoi se siguria është një përgjegjësi e përbashkët, e cila kërkon angazhim maksimal nga çdo punonjës, duke rikujtuar se vetëm përmes disiplinës, përkushtimit dhe respektimit rigoroz të procedurave mund të arrihen standarde të larta në administrimin e institucioneve të vuajtjes së dënimit.
Pjesë e diskutimeve ishte edhe rëndësia e reagimit të shpejtë ndaj çdo situate që mund të cenojë rendin dhe sigurinë, si dhe nevoja për të ruajtur një nivel të lartë gatishmërie në përballimin e çdo sfide operative. Forcat e policisë u inkurajuan të vijojnë punën me seriozitet dhe përgjegjësi, duke kontribuar çdo ditë në mbarëvajtjen e institucionit dhe në përmbushjen e misionit të tij.
Ky instruktazh vjen në kuadër të përpjekjeve të vazhdueshme të IEVP Peqin për të forcuar sigurinë institucionale dhe për të garantuar një ambient të qëndrueshëm, ku krahas ruajtjes së rendit dhe ligjshmërisë, i kushtohet rëndësi edhe procesit të rehabilitimit dhe riintegrimit të personave që vuajnë dënimin.
Me angazhim të vazhdueshëm dhe me fokus te profesionalizmi i stafit, IEVP Peqin vijon të mbetet e përkushtuar në ndërtimin e një mjedisi të sigurt, të kontrolluar dhe në shërbim të zbatimit të ligjit, duke vendosur sigurinë si prioritet kryesor të veprimtarisë së përditshme.