Furnizuesi i Shërbimit Universal në bashkëpunim me Fondacionin “Qatar Charity”, nënshkruan marrëveshjen për projektin social “Dritë në shtëpi”, një nismë solidariteti që synon të mbështesë 1610 familje shqiptare në nevojë duke i ndihmuar në pagesën e faturave të energjisë elektrike.
Qëllimi i këtij bashkëpunimi është të lehtësojë barrën ekonomike të familjeve më të pambrojtura në të gjithë vendin dhe të kontribuojë në përmirësimin e cilësisë së jetës së tyre.
Marrëveshja u firmos nga administratori i FSHU, Algert Luzi dhe drejtori ekzekutiv i zyrës së “Qatar Charity” në Shqipëri, Ahmad Yousef Fakhroo, duke zyrtarizuar angazhimin e përbashkët për të qëndruar pranë komuniteteve në nevojë dhe për të ndihmuar në përmirësimin e jetës së familjeve që përballen me vështirësi ekonomike.
Në ceremoninë e nënshkrimit të marrëveshjes morën pjesë administratori i OSHEE Group, Enea Karakaçi, ambasadori i Katarit në Shqipëri, Jabor Bin Ali Al Dosari, si dhe përfaqësues të Fondacionit “Qatar Charity”, të cilët vlerësuan vizionin social të OSHEE Group dhe nënvizuan rëndësinë e këtij partneriteti që pritet të zgjerohet edhe në iniciativa të tjera solidariteti në të ardhmen.