Kryeministri Edi Rama deklaroi sot se një nga objektivat kryesorë të qeverisë shqiptare është investimi në teknologji dhe krijimi i kushteve që ajo të studiohet në shkollat shqiptare.
Duke folur në Kongresin Ndërkombëtar të Nanoteknologjisë, kreu i qeverisë tha se Shqipëria është e angazhuar që çdo investim në shkencë të shndërrohet në rezultate konkrete për shoqërinë.
“Nuk është një luks, është një nevojë e së tashmes. Brenda dekadës tjetër, çdo i ri që aspiron teknologjitë, duhet të ketë mundësinë t’i studiojë këtu. Ky është vizioni ynë. Është një proces që ka nisur dhe tashmë po shohim hapat e parë. Investimi në arsim lidhet me krijimin e një hapësire për mendim novator, për një brez inovacioni që do çojë qeverisjen shqiptare përpara”, u shpreh Rama.