Radhët e gjata janë rikthyer sërish këtë të shtunë në pikën kufitare të Qafë Thanës, në dalje të Shqipërisë drejt Maqedonisë së Veriut. Kolona e automjeteve ka kaluar mbi 2 km, ndërsa qarkullimi po menaxhohet në tre korsi.
Në pritje janë makina me targa maqedonase dhe të Bashkimit Europian, pasi turistët që kaluan pushimet në Shqipëri po kthehen drejt vendeve të tyre.
Edhe pse po punohet me tre sportele, përpunimi i ngadalshëm i dokumenteve ka krijuar vonesa dhe nervozizëm, me udhëtarët që shprehin frustrimin përmes borive të makinave. Situata është përsëritur disa herë gjatë këtij sezoni veror, duke sjellë probleme në të dyja anët e kufirit.
